爭女新版本︱潘梓鋒疑暗撻《3日2夜》索女怒打「賈明昇」

無綫節目《東張西望》主持潘梓鋒（Bryan）日前突傳出因與圈外女友嘅前度發生肢體碰撞而被捕，即時停工，周三（18日）就有指Bryan其實已婚並育有一女，當日係同老婆前度發生肢體碰撞，而該前度亦係圈中人。點知到咗今日（21日）就有傳Bryan其實係同《3日2夜》女主持吳紫韻（Purple）秘密拍拖，事發當日，Purple約咗《愛．回家之開心速遞》「賈明昇」鄒兆霆上屋企食飯，有人就誤以為女方出軌，一怒之下出手打人，後來有人即向對方道歉，最後鬧上警署。另外，又有另一說法，指潘梓鋒只是跟普通人發生碰撞。雖然傳聞多多，但事件已進入司法程序。

咁啱上月嘅《明星運動會》中，Bryan就係同鄒兆霆出戰拳擊賽對打，二人當時攬頭攬頸合照，表現融洽。今日（21日）Bryan回覆東網時未有多講：「有心，謝謝。」而「女主角」Purple則對傳聞表現錯愕，回應東網時更透露二人僅公司同事：「唔知道呀，都係公司同事，公司聚會見面，你哋搵我都好愕然！」

對於潘梓鋒引爆一連串事件，問無綫助理總經理（藝員管理及發展）樂易玲會否就此事向藝員部整肅一番，她表示：「依家已經進入咗司法程序，唔方便評論太多。一個藝人除咗演戲之外，品德、操守都好重要，因為係公眾人物，形象要正面，所以我哋藝員訓練班第一堂講嘅都係藝人嘅品德同操守，呢啲一定要做好。」