年年25歲！譚詠麟滿場飛生日有3個願望

今日（23日）係樂壇校長譚詠麟（阿倫）71歲生日，一班好友為佢慶祝，仲準備咗「年年25歲」嘅蛋糕，仲有靚女廖碧兒同Gin Lee（李幸倪）陪慶生，阿倫活力十足滿場飛，真係似足25歲喎！佢上載好多張慶生照，不過未知所謂何事，又刪除照片，及後佢轉載由歌迷會製作嘅生日短片留言話：「好多謝，好多謝大家嘅祝福！最緊要大家身體健康！永遠25歲！」而喺短片中，阿倫透露生日願望可以好快開到演唱會、可以同大家聚會及聽到佢嘅新作品！