飛輪海掀扮女人熱　吳尊阿女唔認得老竇：是汪東城女友？

台灣前飛輪海成員汪東城連日嚟大晒借用AI變臉做「女人」嘅片段，點知竟然掀起圈中男藝人扮女人熱，好似佢前隊友辰亦儒、香港當紅男子紅合MIRROR成員Edan等，令人驚訝原來佢哋「變性」後係咁「索」，估唔到依家連出名男生女相嘅吳尊都玩埋一份。

汪東城晒出吳尊「扮女人」嘅新片，片中佢以淺色Low Cut裙、氣質鋼琴Look及茉莉公主3個造型「現身」，當中佢嘅茉莉公主扮相更加係谷出3吋事業線，雖然一到近鏡就出出哋事，睇到穿崩位，不過都依然係大眼「靚女」，吳尊更自爆拎住啲片畀個女Nei Nei睇，點知阿女一見到就衝口而出問：「是不是你（指汪東城）的女朋友？」完全唔認得「變性」後嘅老竇！網友仲拎埋飛輪海三子嘅女人照做對比，嗌佢哋索性扮女人再「合體」，分分鐘殺出新血路。