黑人網紅不足兩年勁吸1億粉絲　輕鬆賺逾1,500萬港元

相信唔少人都睇過呢位黑人嘅幽默短片，究竟佢係點樣靠不發一言而紅透國際，唔夠兩年勁吸200萬美元（約1,500萬港元）？現年21歲嘅網紅Khaby Lame（真名Khabane Lame），於影片平台坐擁1億粉絲追蹤，人氣高企，佢嘅影片全部都不發一言，以無奈表情及招牌雙手嘅手勢，配合低成本製作及剪接技術打響名堂。

出生於塞內加爾嘅Khaby，1歲隨家人移居意大利Chivasso，如有留意，佢不時穿着意大利球衣亮相，可見佢對意國嘅熱誠係幾咁高。其實佢原為工廠工人，收入唔高，因疫情影響被失業，讓佢化身成網紅，亦成為其人生轉捩點。

去年3月先開設影片平台帳戶，以諷刺睇起嚟新奇聰穎，但查實好愚蠢嘅短片為拍攝方向。短短17個月已成為歐洲第1位及全球第2位擁有1億粉絲追蹤嘅網紅，唔夠兩年收入超過1,500萬港元，成績超乎想像！佢更食住個勢開設網店，趁住人氣未消繼續吸金。