楊超越索爆拍劇　孫儷素顏殘Look對撼被讚專業

內地視后孫儷同台灣型男趙又廷合作劇集《理想之城》，早前花絮片就見到孫儷化身超齡小丑女被嗌難頂，原來劇中佢並未要扮後生，小丑女扮相都只係其中一個小造型，反而全劇佢大部分時間都係以素顏殘爆Look上陣，以配合角色，即被大讚專業。佢宣傳新劇時就提到角色需要成日現身工地、戴安全帽，又會熬夜加班，所以佢都唔介意大晒熊貓眼，甚至素顏拍攝。

佢嘅化妝師就爆料指孫儷曾落Order：「拍特別接地氣的戲，如果需要我不化妝，我真的不打粉底，我需要更真實的狀態。」態度敬業。不過原來拍攝期間，孫儷都試過畀導演「捉」，因為化妝師偷偷幫孫儷化咗條眼線，點知拍第一個鏡頭，導演就發現佢對眼「出事」，要化妝師即刻抹咗個妝，搞到孫儷再落Order：「有時候我會跟化妝師說，這場戲之前蘇筱（角色）剛熬了個大夜，頭髮給我弄亂一點，黑眼圈不要補，痘印也不要遮。」似乎絲毫唔怕被同劇嘅前女團火箭少女101成員楊超越比下去，二人仲拍到攬到攬頸添。