《怒火》內地票房破10億！謝霆鋒出旋風連環腿

男神謝霆鋒同甄子丹主演嘅英皇電影《怒火》，開畫至今香港同內地票房節節上升，依家內地票房已突破10億，成績相當彪炳！為咗慶祝票房報捷，霆鋒仲進行「踢票」挑戰，戴住眼鏡嘅佢使出「旋風連環腿」，無論係掃堂腿、轉身飛踢定凌空踢腳，佢都輕易就做得到，唔只有姿勢仲力度十足，淨係個氣勢都贏晒啦！

網民見到都話回憶返晒嚟，因為霆鋒曾經喺2006年上映嘅電影《龍虎門》中，入面個角色嘅絕招就係「旋風連環腿」，大讚佢身手唔輸當年！有網友就話佢咁樣踢腳，副眼鏡都唔跌落嚟，真係好犀利！而有網民就話霆鋒都試過用腿開門都得，踢腿當然難唔到佢啦！