同「龍母」撞樣！迪麗熱巴白髮魔女造型　吸1.4億閱讀量

被封「新疆四美」之一嘅內地女星迪麗熱巴，擁有標致面孔、甜美聲線，加上出色演技而火速走紅。最近開始為新劇《安樂傳》拍攝，孖住小鮮肉龔俊、劉宇寧等齊齊主演，大量劇中造型曝光，除咗多個清雅古裝Look，有網友拍到其中以「白髮魔女」造型成為焦點，引起大批網民熱論，「迪麗熱巴安樂傳白髮側顏路透」有1.4億閱讀量！

其實銀白色髮型只係頭套，髮根隱約透出黑髮，不過就算係假髮都一絲不苟，紮上多條精緻鬢辮，仙氣十足。唔少網民大讚「古裝女神」迪麗熱巴任何造型都能完美駕馭，大嗌唔好再路透劇中造型！亦有網友話同《Game of Thrones 冰與火之歌：權力遊戲》中Emilia Clarke飾演嘅Daenerys Targaryen（龍母）撞晒髮型，一樣咁有仙氣。