出賣阿媽系列︱何超蓮公開三太食相　網民：好貼地！

賭王三房千金何超蓮因為要陪伴男友竇驍，留喺內地時間多過喺香港，而佢媽咪三太陳婉珍早前就到上海探佢，超蓮喺個人短片頻道Post一條短片，紀錄同阿媽喺上海吃喝玩樂嘅點滴，超蓮話：「今天是我親愛的母親最後一頓在上海吃的飯。」鏡頭一轉就影住三太同親友食緊飯，只見三太素顏現身、穿上短袖Tee配長褲，正在品嘗美食，即被網民讚非常貼地。

當三太發現超蓮影佢時，即時耍手話：「唔好影我啦。」超蓮即笠水：「好的，又被罵了。」但佢最後都出賣阿媽，將片段公開。食飽飽後，一行人坐車離開，超蓮送阿媽走，由竇驍負責做司機，期間超蓮問阿媽兩星期嘅上海之旅點樣，三太話：「幾好！」超蓮再問：「何太，就嚟見到你啲貓喇，有咩感想？」三太即表示：「好開心。」