好友紛紛割席︱最憎趙薇之首一定係李亭頤
20210906
東網電視
更多新聞短片
![](/hk/bkn/cnt/entertainment/20210906/photo/bkn-20210906000341599-0906_00862_001_01p.jpg?20210906000406)
內地女星趙薇自從傳被官方列為「劣迹藝人」後,所有作品被下架、社交網要禁聲,連佢自己都下落不明,難怪佢啲圈中好友,包括曾自爆暗戀佢嘅黃曉明,仲有李冰冰、楊紫、楊冪等都疑同佢「割席」,不過同佢最早唔Friend嘅,應該係淡出娛圈嘅台灣女星李亭頤(前名李婷宜)。
曾經同張衞健、林青霞、杜德偉合拍嘅電視劇嘅李亭頤,喺社交網做直播時喊到爆咗,怨自己太單純、太傻、太信任人。啲網民就估佢應該仲係呻緊23年前,被趙薇「搶」咗佢喺《還珠格格》嘅「小燕子」角色嘅事。佢曾經喺台灣綜藝節目度爆大鑊,話當年同趙薇都係眼大大,所以就被《還》編劇瓊瑤欽點做女一「小燕子」,而當時讀緊書,仲同「富二代」葉茂青拍拖嘅趙薇,就做女二演「紫薇」一角;林心如就做較少戲份嘅「賽婭公主」。
點知齣劇開拍前,啲角色全部大洗牌,趙薇突然擔正女一做「小燕子」、林心如就升呢做女二做「紫薇」,冇份拍呢部明知會爆嘅劇,李亭頤先知自己中伏,原來佢嗰位代理經理人,亦即係林心如經理人,就用佢要拍電影,撞咗檔期為理由幫佢推咗,嗰時佢梗係嬲到癲啦,想搵代理經理人算帳時,對方已「離奇失蹤」,完全冇仇報。
不過佢之後就同咗趙薇前男友葉茂青拍拖,嗰時啲人就話佢因為「趙薇搶咗佢角色,佢就搶番趙薇男友」,不過佢死口都唔認做「小三」,就話同葉茂青係名正言順,因為當年葉茂青同趙薇分手後,先同葉茂青拍拖,自己亦唔知葉茂青同趙薇愛戀過。