胡諾言扮補習天王似到足：我未夠班轉行

藝人胡諾言（胡仔）於無綫新劇《廉政行動2022》演補習天王，為配合劇情，劇組特別製作大型宣傳畫布，戴上眼鏡兼穿上西裝的胡仔翹住雙手，一副專業模樣，構圖幾可亂真，胡仔接受東網訪問時，笑指入行以來未試過有一張如此大型的海報：「我都忍唔住影相留念，覺得突然之間變咗知識分子，我啲粉絲即刻叫我轉行，我話自己未夠班邊有可能，只係讀過社會大學，不過多謝監製畀咗個咁好好玩同咁有發揮嘅角色畀我。早兩日拍呢場戲時，我一入到個場地，台前幕後同啲演員係咁叫我角色名『劉Sir』，跟住放飯仲好笑，因為張海報實在太大，搞到好似大家去到邊，海報中嘅我都係望住佢哋咁。」