Maggie Q平衡球晒身手　超大花園意外曝光

轉戰荷里活發展嘅混血女星Maggie Q，近日有份演出嘅新片《復仇殺姬》（The Protege）上映，除咗性感火辣造型成為焦點外，當然唔少得佢親身上陣嘅動作戲，網民大讚身手不凡，將女殺手演繹出層次感。

雖然Maggie Q主攻外地，但仍不忘與內地粉絲互動，不時更新內地影片平台。近日佢又上載新片，片中佢接受平衡球挑戰，大顯敏捷身手，跪喺平衡球上嘅佢，接過拍片者拋過嚟嘅波，每一球都接中，零失敗！另一亮點當然係身後大大個花園，除咗綠油油嘅草地，仲見到有泳池，空間非常闊落，而多隻狗仔仲喺草地上「自由行」，睇嚟Maggie Q外國生活好寫意，真係令人羨慕呀！