效法袁偉豪閃婚？陳家樂面紅紅冧笑扯開話題

藝人袁偉豪、陳家樂等在將軍澳電視城為劇集《把關者們》宣傳。陳家樂飾演海關見習督察，角色更是劍擊運動員，事前更上堂學劍，他自嘲只是有姿勢冇實際：「睇奧運嘅時候諗點解當時唔學好啲，起碼識啲規則，咁樣會睇得精彩啲，自己都有興趣再學。」

袁偉豪則飾演家樂上司，回想起第一次見面覺得對方有點cool，他笑說：「開工之後大家原來好啱傾，大家都鍾意音樂、電單車、結他，都想再次合作。」陳家樂笑說：「你講呢啲呀，你當時結婚我哋都係睇報道先知，完全冇徵兆。（仿效袁偉豪閃婚？）唔講呢啲喇。」

誚到他與女友連詩雅昨日（8日）分別在社交網上載出海滑浪照片「放閃」，似乎有意將戀情浮面，他面紅紅笑說：「我想閃令令喺我身形上，其實拍《把關者們》嗰陣開始操增緊磅，肥到豬頭咁，近幾個月畀心機去操、減脂。（戀情浮面？）希望大家將個焦點唔好放喺其他地方，放喺我嘅工作、身形上，依家操弗完成第一階段，大家唔好諗太多，總之玩得開心啦。」