接受情侶檔行騷!盧慧敏融入Ian家 中秋一齊做節

2021年09月12日 10:01
東網電視
更多新聞短片
混血索模Amy Lo(盧慧敏)一直都係時尚界嘅寵兒,日前為雜誌拍攝更一嘗射箭滋味,點知喺學習期間因為用力過度搞到手臂瘀晒!佢包冚上身、大晒筷子腳出席時尚匯演,問到行騷出身嘅佢有冇「餓騷」?Amy笑話都有,覺得行騷好好玩,仲自爆經常發生蝦碌事,綵排嘅時候成日仆親︰「仆咗喺度唔知笑好定喊好,可能之前仲新、高踭鞋又唔識着,加上當時又唔知發生咩事,大家行得好急,一聽到『Model go』就會畀人推咗出去。」之後佢再爆原來正式行騷都試過一次跌低,最後靠靚樣「執生」︰「保持一個得體嘅樣,笑住企番起身之後行,返到後台見到膝頭腫晒。(有冇留下陰影?)咁又冇,我要克服呢件事!」
問到如果之後叫佢同男友Ian(MIRROR成員陳卓賢)以情侶檔行騷OK?Amy大方答可以︰「佢高度應該OK,可以呀!我覺得係一個幾好、幾得意嘅經驗,咁我哋之前都有合作過拍劇(《無限斜棟有限公司》),如果有品牌、活動傾得成,都唔會抗拒。」再講到佢日前喺社交平台晒相賀《無》開拍一周年,乘勝追擊問係咪同樣代表拍拖一周年?Amy爆笑話只係就嚟一年,仲自嘲係勁冇儀式感,暫時未諗禮物︰「我會準備吓!平時無論係大時大節、朋友、屋企人生日,我都鍾意DIY,整吓啲卡仔、小飾物當Surprise。」
至於問到雙方見咗家長未?佢冧爆話有認識︰「佢(Ian)開騷都會邀請佢啲屋企人,所以有見過。(見埋家長令關係更邁進一大步?)差唔多,我係比較Chill,當識朋友咁,溝通起上嚟會Friendly啲、真啲。」有冇上屋企食飯?加上嚟緊又中秋節會做節?佢Keep住面紅紅、怕醜咁話︰「正常次數啦,哈哈!禮貌上都要嘅,同埋認識咗都開心嘅。」