如果王家衛拍《尚氣》　究竟會係點？

影帝梁朝偉演出嘅Marvel電影《尚氣與十環幫傳奇》，好評如潮，個個大讚佢演得出色，英文又講得流利，造型又型仔，總之咩都Very Good啦！有網友睇到入晒血，喺度諗如果Marvel電影畀王家衛拍會係點呢？網友喺討論區發起討論，佢哋嘅留言真係笑死人！

有網友喺度幻想，如果王家衛拍《復仇者聯盟》系列，當一班超英打到最終Boss魁隆時，突然同佢講：「不如，我哋由頭再嚟過。」好有《春光乍洩》Feel！又有網友話：「如果我有多太空船飛，你會唔會跟埋我走？」《花樣年華》對白都啱使！亦有網友突破盲點，留言：「拍到2046都未拍完。」真係笑死！

咁如果王家衛《尚氣》又會係點呢？網友首先話：「咪影吓啲毛巾滴水，點咗支煙又唔食，由佢自己燒完嗰啲咁啦！」諗落風格都似嘅。亦有網友爆出金句：「十環之後係啲咩？咪又係另一個十環。」呢啲對白都真似到足！最後有網友夠晒爆笑，叫文武（梁朝偉）套用《一代宗師》句對白：「功夫兩個字，一橫一直，錯嘅瞓低囉，企得番喺度嗰個先啱晒，係咪咁話？」又啱用喎！