3張相見證成長！麥明詩8歲頭髮勁蓬鬆　網民跪求復刻

前港姐冠軍麥明詩近年轉戰做OL，不過佢冇因為減少幕前演出而放棄Keep Fit，身形愈來愈靚。時光飛逝，佢為紀錄自己多年來嘅變化，網晒分別係1999年、2007年同2021年嘅家人合照，又分享小時候同屋企人郵輪旅行經歷，佢留言︰「記得細細個爸媽帶我哋上郵輪，最鍾意跑上跑落去唔同嘅deck，餐餐自助餐，爸媽帶住我哋去泳池去睇show，瞓覺仲可以將上層床反落黎爬上去瞓，覺得好好玩。」到長大後，就可以玩得豪啲，佢又話：「upgrade到露台海景房，去啲sit down restaurant食好嘢，仲鼓勵爸媽落club同攀石。」最後佢話︰「回顧過去20年，真係一個好有趣嘅歷程，好感恩嘅係我哋一家人到今日都齊齊整整，開開心心。」

三張合照都見證麥明詩嘅成長，網民就將重點放喺最久遠嘅1999年合照中，話當時8歲嘅佢臉圓圓，而且一頭短髮非常蓬鬆︰「你細嗰陣張頭髮好搞笑」、「你個99年髮型係時候復刻啦！」