兩派歌迷掀罵戰︱歌神張學友被MIRROR挑機?

20210913
東網電視
更多新聞短片
歌神張學友昨晚(12日)現身《2021香港小姐競選決賽》,激罕擔任壓軸表演嘉賓,連唱4首歌足足15分鐘,十足小型演唱會,即惹起全城熱議,不但備受香港觀眾關注,就連內地都引起哄動,一度登上內地熱搜榜,更有超過2億閱讀量。
學友闊別20年難得重登港姐舞台,當然廣獲樂迷支持,唔少網友大讚學友超班演出,實力維持一貫高水準,紛紛大讚:「成個show為咗睇學友」、「簡直演唱會級享受」、「香港歌壇超級巨星就係張學友!」甚至感謝歌神嘅出現將一家人凝聚起來,重燃睇港姐嘅熱情。不過亦有網民笑指學友愈唱愈high,多次重現經典「蘭花手」動作,又指當晚音響未夠完善,未能將學友嘅歌聲完美呈現。
雖然反應熱烈,不過竟然有網民將學友同新生代人氣男團MIRROR作比較,更直指當中嘅唱將Jer(柳應廷)係「新歌神」!有網友指學友歌藝超群,技巧毋庸置疑,但就認為Jer於感情拿捏上亦有優勝之處:「阿Jer可謂新歌神,《砂之器》貼近人心,非常感動」、「Jer嘅演繹能夠完全帶入首歌嘅故事同意境,唔會過分注重技巧!」大讚佢充滿潛力,於年輕一輩中實力較為出眾,絕對係後起之秀,假以時日定能拍得住學友。另有人指MIRROR的姜濤人氣更勝學友,但就有網民卻認為姜濤完全「未夠班」並狠批:「姜濤可以同佢挽鞋!」。
不過亦有不少網民指出兩代歌手各有市場,不應作無謂及過激的討論:「兩代人,理念不同,冇得比較」、「好似以前啲人話張學友唱歌好聽,一樣會畀長輩話:關正傑嗰啲先係唱歌,你啲後生識乜...」等,表示把入行37年的殿堂級歌手與新人比較實屬不公平。