寫17首歌公司都唔收貨！布志綸想喊　算攀石搵作歌靈感

歌手布志綸（Alan）日前為TVB娛樂新聞台節目《StarTalk》，接受主播許文軒（Edmond）專訪，大談轉投新唱片公司推出歌曲《第一億次細胞分裂》感受，Alan說：「其實簽咗新公司後都磨合咗一段時間，呢大半年一直有寫歌，大大話話交咗16、17首歌，但公司一直唔收貨，佢哋想我簽約後第一首歌光明少少。好記得開咗嗰個會之後，好似畀人打咗一錘，當時有少少想喊，唔通又要等！第二日本身約咗朋友攀石，差啲想放飛機，唔知點解去到風和日麗，陽光普照，成班人好熱血，成件事好有力量，攀石嘅環境令我有靈感構思旋律，原來攀緊石係可以作歌！」

談到近年愛上戶外活動，他說：「受中學同學影響，以前我好怕水，遊船河、划艇一定Say No，因為驚浸親同暈船浪，依家鍾意行山、攀石、滑水同划艇，試過自己一個人出海划艇划咗10Km，自己都估唔到，依家曬到黑晒！」