馮盈盈何依婷變迷妹追星　?張學友合照慘食白果

歌神張學友相隔20年重返港姐決賽舞台，擔任表演嘉賓一連唱出4首歌曲，成為全晚焦點之一，原來唔只觀眾興奮，就連前港姐冠軍馮盈盈及朱晨麗、亞軍張秀文及何依婷都化身追星族，希望同歌神合照，不過又點會咁易呀！

4位港姐一早喺廠外等候，打算喺學友唱完離場時候截胡合照，其中盈盈仲練定開場白，而何依婷就諗定學友離場路線，點知喺學友唱完後，就有廣播叫佢哋4人要入廠，盈盈即時扭計：「點解會咁㗎，你畀我哋影埋相先！」點知同時間，學友竟然喺另一邊出口離開，盈盈同何依婷立即趕上，盈盈仲遠處跪求：「可唔可以影張相？」但最後都徒勞無功只能目送學友離開，當堂成個呆晒，而何依婷就話想喊！

而另一邊廂，攝影師就成功趕上攔截歌神，娛樂新聞台主持問到開唔開心，天公造美，學友就話本來以為冇得做。當被叫到：「多啲返嚟喎！」學友就笑晒口：「好呀好呀！Thank you！Thank you！」