各自長期嗌單身　安德尊宋芝齡翹手行街街

藝人安德尊（大王）同宋芝齡由休閒節目《都市閒情》合作至依家《流行都市》，兩個成日都一齊主持，感情好到家人一樣，估唔到日前二人被發現煙韌翹手行街，兩人大方出巡時不時耳語，表現親蜜，即有消息指二人原來已經秘撻超過一年！二人邊行邊傾儼如情侶，結伴買快餐後就一同上新蒲崗一私竇蜜會兼醫肚。

其實大王同宋芝齡相識多年，大家都一直自稱「單身」，節目中成日鬥嘴，估唔到依家傳出愛火花。二人同為「搵得」之人，好似大王多年來買下大批地皮起樓兼炒地舖，被封為「元朗地王」，加上有傳其家族生意規模龐大，連加拿大亦有物業揸手，曾被好友笑稱是「安億萬」；而宋芝齡亦係圈中小富婆，身為中韓混血兒嘅佢早年開設韓語學校，又搞小學補習社，財源滾滾來，似乎二人都有共同話題。

不過宋芝齡回覆東網時否認戀情，指自己很久以前已認識大王，大家係好兄弟、好姊妹，嗰日翹手係拍緊《流行都市》外景，有時仲會拖手，但絕非戀人，只是好朋友，對方是自己永遠的哥哥。