懷孕25周︱Rosemary天台圍牆玩瑜伽勁牙煙

名模Rosemary早前宣布再為印度籍老公Jason懷有第2胎，熱愛瑜伽嘅佢經常喺社交網大晒軟功，動作一次比一次高難度，即使孕肚開始大，依然揮晒自如，而且任何地方都可以變為佢嘅瑜伽中心。現懷孕25周嘅佢，日前晒出喺天台圍牆上做瑜伽嘅相片，擘腿輕易做出一字馬，不過有網民就為佢肚裏嘅BB好擔心，喺圍牆做瑜伽已經夠危險，更何況佗住BB。

除咗天台圍牆，泳池亦係佢嘅瑜伽天地，尋日（13號）上載與名模好友貝安琪母帶埋寶貝仔到酒店戲水相片，兩位人母喺池邊玩瑜伽，小朋友就玩水，享受與陽光嘅一刻。