王一博冇主持人證慘被降呢　零發言淪人肉布景版

內地流量小生王一博近期頭頭碰着黑，先有與內地一線女星趙麗穎因兩次合拍劇而引發雙方粉絲喺網上「互片喪鬧」，佢面臨嚴重懲罰後，再疑受國家廣播電視總局（廣電局）最新8大新規之中嘅「堅決反對唯流量論」影響，雖然佢即時補鑊開咗個「官方粉絲團」帳號配合政策，但一樣「劫數難逃」，連中秋晚會都臨時冇得做。

以為捱過「冷河期」就有生機，喺最近一期嘅內地綜藝節目《天天向上》亮相，點知因為又有「主持人必須持證上崗」嘅政策，佢由節目嘅「核心」人物變成嘉賓主持，兼且出鏡率奇低，當到為佢度身訂造嘅「街舞」環節時，佢露面時間只有8分18秒咁大把。

而喺呢個8分18秒中，佢全程好似「人肉布景版」咁，全程都係企喺兩位節目主持人汪涵同大張偉身邊齋聽人講嘢，近乎完全冇發言嘅鏡頭，睇到佢班粉絲大叫心痛，喺網上「詐型」話呢個節目之前仲有收視，全靠班「博粉」盲撐，但家陣偶像喺節目度完全係可有可冇嘅閒角，粉絲話寧願走去打機、落街踩單車，都好過嘥時間睇個節目，有粉絲甚至要求偶像退出，唔好再被節目繼續消費落去。