密密做體力透支 姜濤暈倒Anson Lo擔心喊到眼紅紅

2021年09月15日 00:01
東網電視
更多新聞短片
男團MIRROR人氣爆燈,單計歌影視三棲發展已經日日做到冇停手,更是廣告、代言界寵兒,平均一星期最少一單品牌活動,成娛圈最吸金藝人!初踏入影壇拍攝處男電影的「人氣王」姜濤,近日開工Chur到盡,活動期間突體力透支直立式暈倒,身體響起警號!事後Anson Lo疑擔憂到爆喊,雙眼紅腫再現身。
MIRROR 4子姜濤、Jer、Anson Lo及Edan,昨日(14日)現身尖沙咀某商場出席品牌活動,場地一如以往被「鏡粉」逼爆,人數過千企滿樓高3層的商場。行頭的Edan非常識做向Fans揮手打招呼,跟隨其後的姜濤則雙手舉V,現場所見,除了Edan樣子比較精靈之外,正趕拍電影的姜濤、Jer及最近忙拍新歌MV的Anson Lo面露疲態,但仍敬業跟指示去到不同打卡位影相,期間見Jer全程傍實姜濤,並用手輕搭對方膊頭,似乎已知隊友身體不適。
繼而當4子擰轉身面向傳媒拍照時,見姜濤頓時面青口唇白兼開始左右原地搖晃,明顯不適「死忍」,未幾突然腳軟見暈,「嘭」一聲直立式倒地,幸好意識清醒,但足以嚇壞隔離3位兄弟兼全場所有人!身旁的Jer即時伸手扶起姜濤,再有10多名工作人員秒速衝上前幫忙,最後姜濤由2位工作人員攙扶離場,邊行更邊露出反胃作嘔痛苦樣,而另外3子亦一同返入後台,活動立刻腰斬!
除姜濤外,其餘3位成員約8分鐘後再度現身,繞場一周同「鏡粉」揮手道別,當中Anson Lo多次用口形表示「辛苦晒」,有眼利Fans發現偶像雙眼通紅,疑擔心姜濤出事爆喊,即反過來安慰「冇事㗎」,問到Edan關於姜濤的情況?他大派定心丸指對方冇事,續逗留約2分鐘後快閃離去。
據姜濤社交網發文,同日凌晨2時曾Post相報告收工,未知是否與工作時間太長又繁忙關係,缺乏休息之下再開工致體力不支倒地,是次「斷電」其實並非首次,他5月開騷曾自爆因連日冇假放,綵排演唱會時暈低,醒來才發覺暈過;其他成員都有「歷史」,上星期Anson Lo出席另一活動自揭曾連踩70多個鐘開工,當日開30幾個鐘只是「濕濕碎」,化妝曾短暫見暈;Edan亦試過日踩20個鐘拍攝等。
經理人花姐隨即於社交平台出Post代為報平安,揭姜濤一早有少許胃痛︰「現場環境有點焗,加上閃光燈不斷,所以有少許腳軟而跣低,現在休息中,沒有大礙,請大家放心,多謝大家關心。」又謂已落Order不准姜濤因減肥節食,將停工兩天由其家人照顧︰「大家不用擔心,老姜答應我,呢兩日會好好休息。」至於姜濤正拍攝新戲的導演彭秀慧,同樣於社交網發文指劇組會全面配合,先跳拍姜濤部分,讓他有足夠時間休息。