周子馨孖翟威廉睇時裝騷　原來係改衫高手！

女星周子馨（Julia）日前孖住翟威廉出席時裝騷，前者透露自小受從事車衣工作的母親影響，經常把穿到舊的衣服剪爛，之後再以不同布碎車埋，變成獨一無二的DIY衣服，但由於缺乏潮流觸覺，故入行後經常觀賞時裝騷，望趁機偷師：「好鍾意去時裝騷睇人哋嘅設計，今次個騷主要係用可持續布料整返啲衫出嚟，帶出環保主題，其實好多設計師都有自己風格，有啟發到我，因為市面上實在太多顏料同布料好浪費。」談到與威廉相識經過，Julia表示二人因唱歌結緣，再加上有共同朋友陳庭欣，獲悉對方對日本清酒有研究，也會不時請教對方：「會問酒方面嘅知識，有時又會搵佢舖頭訂酒。」

而甚少參與時裝界活動的威廉，笑指過往睇騷可謂五隻手指數得完，不過對於今次環保主題就非常支持：「個騷有好多靚衫，除咗有啲成件藝術品咁，亦有啲可以出街，我好鍾意香港區作品，好有型，希望各界嘅設計師愈做愈好啦！」