麥明詩哥哥有料到　整型外科畢業！

前港姐冠軍麥明詩讀書叻到飛起，會考拎10個A，被封為十優港姐。但原來佢阿哥麥明山讀書都好勁，2013年喺香港中文大學醫學院畢業，最近仲專科畢業添！

麥明詩喺社交網晒出哥哥個畢業相，留言：「你終於專科畢業啦！由細到大見到你讀書嘅努力，on call36嘅辛苦，成日食食下飯衝返去醫院，仲要番住工咁溫書去應付專科考試。整型外科一啲都唔容易，有時候你做手術一做就十幾個鐘，要治療、重建嘅傷患每個都唔同。麥明山你得咗啦！另外恭喜我爸媽養育咗佢地兒子成為一個咁好嘅醫生。」網友紛紛畀Like恭賀，又留言大讚麥爸爸同麥媽媽好犀利，培育到兩個咁叻嘅仔女！