失蹤人口︱同朱千雪撞樣　前港姐鍾沛枝近照曝光

歷屆咁多港姐，唔係個個都會進入娛樂圈工作，人走茶涼，漸漸就被人遺忘，好似2001年港姐亞軍嘅鍾沛枝，淡出娛樂圈多年，最近被指撞樣朱千雪，兩人五官同樣眼大、面尖、輪廓深，猶如兩姊妹。不少網民都留言表示：「真係好似朱千雪」！

18歲選港姐嘅鍾沛枝，現年已經39歲，但仍然保養得宜，甚至比選美時更靚，離開娛樂圈後，佢轉職做航空公司地勤，不過做咗幾年就離職，及後轉行做美容，有指佢近年已經做少奶奶，而佢社交網經常都上載周遊列國嘅照片，睇嚟嫁得唔錯。據知，鍾沛枝父母在上環經營燒臘檔，係老字號，經常大排長龍，佢除咗於美容中心工作，閒時都會到店鋪幫忙收錢，分擔家人工作。