張致恒終於還晒錢　Naomi落「追數令」成功

藝人張致恒（Steven）前年向馮鎵瀠（Naomi）借了2萬元，一直都未還完，日前，Naomi講明若對方仍不還錢，便會於本月18日Steven拳賽當日去追數，她亦坦言不想「獻醜」，希望對方盡快還款。

追數令一出果然Work，Steven今日（15日）終還清債項！Naomi接受東網訪問時表示：「佢啱啱還咗錢，佢前前後後一共欠我2萬蚊，由2019年6月到依家，歷時2年多，都幾長時間，我係仗義幫忙唔想畀人搵笨，當我係提款機，借完錢就唔見影，當冇事發生過，呢啖氣吞唔落，今日覺得攞番個公道。（會唔會再借錢畀佢？）對於冇承諾嘅人，唔應該再借錢畀佢，我都呼籲其他人唔好再借錢畀佢，因為係一個無底深潭，令佢愈爭愈多錢。」談到可會做番朋友？她說：「好難做朋友，我同佢識咗20年都咁樣，呢啲朋友多一個唔多，少一個唔少，佢都冇當過我係真正好朋友。（佢怕你喺拳賽上追佢還錢？）絕對係。」