遮遮湊孫之旅未成功　張敬軒焗吔「水草偈油蒸石斑」

歌手張敬軒（軒仔）因分享工人姐姐「遮遮」炮製「伏味早餐」，而令「遮遮」爆紅，閒時亦會分享二人之間嘅趣事，帶畀網民唔少歡樂。日前軒仔意外地得知「遮遮」希望攞Visa去探個孫，前日（13號）一早去見領事。

不過疫情關係未能順利申請，軒仔再喺社交網Update，借住「輻射魚」形容「遮遮」失落嘅心情：「阿遮去湊孫因為疫情有阻滯，要再入紙。其實佢係咪將佢嘅心情折射咗落今日呢道菜入面？佢會繼續幫我阿媽湊大我，祝我好運。」

佢仲踢爆「遮遮」喺超市買條魚：「係嗰啲搵發泡膠碟同保鮮紙包住喺超市雪櫃嗰啲，我尋晚摷雪糕食嗰陣有喺下格急凍瞻仰過佢。」佢又一如既往批評對方廚藝：「其實佢隔離嗰個係豉油定偈油？張公館宴客餐單再加一味，水草偈油蒸石斑。」齋睇文字已經好有畫面！唔少網友過目完為「遮遮」爭取番啲分，留言話：「今次姐姐整得幾好喎。」、「阿遮將啲菜擺得好整齊。」、「阿遮遮進步咗好多喇，佢為咗你仲學埋廣東菜！」