閉關練舞冇得滑水!關智斌靠「男人恩物」搵樂趣

20210916
東網電視
更多新聞短片
英皇藝人關智斌(Kenny)有「浪之子」之稱,得閒就鍾意出海玩Wakesurf(無繩滑水)兼晒吓肌,不過最近佢就要參加內地真人騷《蒙面舞王》第二季,日日都要練舞,又點有空閒時間出海呢?但有時滑水癮起又好難搞,所以聰明嘅佢就動動腦筋,諗吓計,終於畀佢搵到代替品,既唔使用時間出海,又可以過到滑水癮,仲可以練到男人需要嘅腰力,佢真係好聰明呀。
Kenny就喺社交網隆重介紹呢個「男人恩物」,就係好似滑水嘅平衡板喇,佢話只要將塊平衡板放喺個條狀嘅瑜伽輪就大功告成,佢用港普話:「這個就是平衡的板,其實就是鍛煉技術之外,這最重要一件事情,它可以鍛煉你的腹肌,因為這個特別考你的平衡的力量。」
跟住佢就示範一次,當佢成功踩住塊搖擺不定嘅平衡板時,睇落都牙煙,一個唔小心,隨時跌到四腳朝天,連腰骨都斷埋,不過玩開Wakesurf嘅佢,平衡力係有啲料到嘅,試咗幾次就可以企喺塊度右碌左碌,仲擺埋滑浪嘅型仔甫士,佢又話:「行呀,真的蠻像我去沖浪的感覺,沖浪你的前腳一定要微微的彎曲,後腳是用力的,滑水去,很多人說玩這個很需要腹部的力量,那麼說玩久了的話,腹肌都會出來,但是很多人的平衡力不太好,我覺得好像我第一天玩到這個樣子。」挑戰成功,好勝嘅佢又話要挑戰更高難度,佢好自信話:「我估計應該沒有難度。」之後慢慢嘗試喺塊板度蹲低,雖然險象環生,但又畀佢過到關喎,最後佢想表演連人帶板跳起,點知衰咗,失威添。