姜濤叉足43粒鐘電復活開工　晨咁早就蒲頭

人氣組合MIRROR成員姜濤本月14日出活動時，身體不適暈低，嚇窒全世界。休息咗接近43小時後，今日（16）晨咁早就開工拍新片！今朝7點半，佢喺助手陪同下出發開工，姜濤着住黑色衞衣現身，戴晒口罩笠晒帽，但佢都仲有幾聲咳，真係要小心身體呀！另外，尋晚佢靜雞雞去咗同朋友打籃球，出番一身靚汗！

原來今日姜濤去咗主題公園開工，有讀者報料指，現場所見，姜濤叉足電精神大好，一到場就同工作人員打成一片！姜濤戲中角色一直都保密，但其實佢片中係飾演偶像歌手，今日就係拍攝演唱會場面，數百名姜糖充當臨時演員支持偶像，大家都好聽話，跟足指示去做！姜濤見到一班「姜糖」，都有報平安，話自己冇晒事，為咗令佢哋更安心，姜濤更以郭富城聲講「冇事」，令到一班姜糖開心尖叫！

而姜濤嘅《蒙著嘴說愛你》MV點擊突破900萬，粉絲們感到好振奮，係咁開Post慶祝！而姜濤早前聯同ERROR成員肥仔出嘅歌《特務肥姜2.0》，點擊已逾150萬次，兩班粉絲為偶像，準備咗巴士燈箱應援，認真有心！

另外，MIRROR紅到飛起，仲上埋日本電視台NHK頻道嘅「國際報道2021」，節目中解構MIRROR點樣喺短短3年內成為香港最紅偶像，又話呢20年嚟香港都冇出現過咁有人氣嘅偶像，依家佢哋受歡迎程度已經成為社會現象。