謝霆鋒去廁所都練左右手　最強防狼術係嗌救命！

自爆申請緊退加拿大國籍嘅型男謝霆鋒，早前表演「左右手齊揸筷子」，令網民嘆為觀止，讚佢技驚四座，其實佢呢招「左右開弓」又點樣練成嘅呢？係咪關佢高智商事呢就未知，不過一定同毅力有關，佢曾經喺訪問時，詳解點樣練成左右手都可以一齊玩佢喺英皇電影《怒火》中成日轉嘅蝴蝶刀。

霆鋒邊轉住佢兩把蝴蝶刀，邊話要練到人刀合一，就要將刀融入生活中：「我練了雙手跟丹哥（甄子丹）去打，那段時間我就是左手練時，右手就食飯，右手練時就左手食飯，上廁所時就雙手練，你抓着（蝴蝶刀）這一邊，如果轉筆的可以一氣呵成。」示範完，霆鋒Chok到盡頭，將頭微傾側向左，而懾人眼神就射向右，再用蝴蝶刀當梳就用，真係想電死女咩。

霆鋒喺《怒火》中同宇宙最強嘅甄子丹動作連場，打到七彩，係人都知霆鋒啲真功夫係咩料，主持人就格鬥教練都準備埋，叫佢即場過兩招教啲女仔防狼術，戴咗拳套嘅霆鋒就行埋個教練，邊準備出真章邊大叫：「最好的方法就是…救命啊。」然後極速離開，雖然場面好爆笑，但霆鋒又冇講錯喎，正謂「三十六着，走為上着」嘛。