劉穎鏇搞三角戀 丁子朗自認戀愛白癡

20210916
東網電視
更多新聞短片
藝人劉穎鏇(Tiffany)和丁子朗今日(16日)出席無綫熱播劇《把關者們》宣傳活動,Tiffany着短褲大晒養眼長腿及纖腰,於台上指為劇集犧牲,剪成男仔頭,不過她笑言還有另一個假髮造型:「因為唔係順拍,當時未剪到短頭髮,有幾集係戴住個假髮,睇落係有啲怪,但冇辦法,哈哈!由細到大都真係未試過剪咁短,一知道要剪嗰陣好大打擊,好驚剪完塊面好包、好腫,身邊啲人又係咁嚇我!(最後滿意造型?)係冇想像中咁恐怖,可能已經畀大家打咗個底,有人仲話好襯我。(想Keep短頭髮?)應該唔會,長頭髮造型多啲!」
最深刻拍步操戲
丁子朗透露今次不用操肌,跟團隊去到真正的海關學院拍攝,最深刻是拍步操戲份:「要夾到十幾個人操得齊同一個動作好難,齋拍行路都要十幾個Take,而我仲要係扮操得最叻嗰個,戲裏、戲外都畀人鬧,哈哈!我哋能力有限,盡量做到最好,導演都有補拍一啲鏡頭幫手。」Tiffany笑言拍攝期間見到真正的海關學員操得好齊,覺得他們好犀利,又自爆每次拍完都會腰痛,幸好沒有腳腫及腳跛。
講到他們於劇中跟孔德賢之間的三角戀時,丁子朗大賣關子指不能透露更多,總之最後是個Happy Ending:「我個角色完全係戀愛白癡,淨係做好自己份工。(有冇親熱戲?)冇,係段好純嘅Puppy Love。」