謝霆鋒四川高原策騎奔馳　魅力揮贏藏族男神丁真

型男謝霆鋒早前自爆申請退加拿大國籍引起全城熱議，向來專業嘅佢不受輿論影響繼續如常開工，近日就到訪四川甘孜藏族自治州理塘縣，除參觀名勝景點，又於高原上游走感受大自然氣息，型格步姿十足拍MV一樣，佢又自拍留念，並表示：「我在四川理塘，來看看這裏的藍天白雲。」佢更着上當地服飾，獲網民大讚完美融入理塘，與當地人並排毫無違和感。

與此同時，佢此行亦與早前於網上爆紅，而成為四川文化旅遊宣傳推廣大使嘅藏族青年丁真合作，齊齊喺高原上策騎奔馳。其實二人之前曾有緣相遇合照，今次再度同框令人期待。有網民翻出舊日合照，見雖然現年20歲嘅丁真因被指神似吳彥祖加金城武嘅混合體而一夜成名，現於社交網擁有逾2百萬粉絲，被封為藏族男神！不過年紀大足一倍嘅霆鋒拍埋去魅力依然超晒班，令丁真即使跌Watt，百萬網紅都變小粉絲。