馬國5人幫回唔到國　Gin Lee楊秀惠聚埋思鄉

藝人楊秀惠（Vivien）今日（17日）出Post透露同靚女朋友慶祝生日，細心一睇發現呢餐飯嘅「飯腳」有Gin Lee（李幸倪）、廖子妤、林宣妤同龔柯允，不過呢5個人喺娛樂圈各自有唔同發展嘅領域，聚集埋一齊點睇大纜都扯唔埋，但其實佢哋之間原來有個微妙嘅共通點，就係家鄉都係馬來西亞，實行可以組隊做「馬國5人幫」！

Vivien留言話佢哋都係一班喺香港努力拼搏、但因為疫情搞到好耐都冇法回鄉嘅馬來西亞女生，因為思鄉，所以聚埋一齊大歎馬來西亞美食︰「講着我們熟悉的語言，提早慶祝中秋節的同時，也慶祝Malaysia Day，和補祝Gin Lee的生日。期待下次再聚。」字裏行間充滿愛，離鄉別井工作互相扶持，團結就係力量！