「邦女郎」奧嘉古莉寧高搵命博　砌槍下海打真軍

烏克蘭女星奧嘉古莉寧高（Olga Kurylenko）最近於漫威超級英雄片《黑寡婦》（Black Widow）亮相，飾演被毀容的反派，其實她本身是美女，曾在丹尼爾格力（Daniel Craig）主演的《新鐵金剛之量子殺機》（Quantum of Solace）擔任邦女郎！

模特兒出身的奧嘉，為應付邦片的動作場面，接受艱苦訓練。她受訪時透露：「我學咗開槍，包括瞄準同揸槍姿勢，仲有點樣拆散支槍再砌番。」她也親身上陣拍攝動作場面，受了不少傷：「當然有瘀傷同擦傷。我整親係因為我差唔多打真軍。例如你見我畀人撻落地下，我係真係撻落地下。」

其中一幕她在高速噴射船上拍攝追遂打鬥，而撞船是真撞，她可謂搵命博！她表示：「我記得特技動作指導走埋嚟，望住我隻眼同我講：『奧嘉，我哋係好認真，記得揸實，OK？無論點都好，用盡力去揸實，因為個震盪會好強烈，你可以會被拋落海。所以你做咩都好，一定要揸實。望住我，呢樣好重要。』我就諗，嘩，嚟真嘅。因為架船係真撞我哋，唔係用電腦特技……佢哋唔係講笑。」