跌親扭傷腰行唔到!張敬軒痛到呻吟流口水 多得貴人相助

2021年09月18日 12:01
東網電視
更多新聞短片
歌手張敬軒人前搞笑但有苦自己知,佢今日(18日)凌晨喺社交網透露原來呢兩日跌親搞到扭傷條腰,但佢都不忘發揮幽默本色,笑言「定係後腩」。佢話:「尋日(前日16日)喺倉攞嘢時,一失重心踩空向後Dun一Dun,初頭起身都仲郁得,返到屋企開始唔行得。」不過佢唔只喺圈中人緣好,私下都有「貴人」相助:「好彩蕭生蕭太四手連撳,按摩膏加跌打酒捽捽拑拑,起得返身。再睇埋醫生今晚已經郁得番好多了。」
蕭生蕭太係邊個?軒仔透露喺佢嚟香港時冇耐,有次喺琴行買琴,同一位送貨員結緣,對方就係蕭生,廿年以來,佢哋兩夫婦都不時關照佢:「廿年了,佢哋幫我搬屋搬廠搬寫字樓,細至搵一個電子零件、車衫車袋車琴套,大至搬錄音室/餐廳/演唱會後台/公司辦公室,佢哋都幫我處理得妥妥當當。」
而軒仔並上載按摩片段,聽到佢不時呻吟,又痕到喺咁笑仲流口水,並留言:「同場加映案發後痛到吖吖聲同痕到GapGap聲 😵‍💫」網民都祝福佢早日康復:「正所謂你點對人人哋點對你呀嘛😌」、「明明好同情你嘅遭遇😢點知聽你把聲😂忍唔住笑咗!」、「要好好多謝你啲肉肉保護你!」周家怡都叫佢:「小心龍體啊!🙏🏻」