林子祥靚聲撼內地唱將　現身婚宴親民合照唱爆咪

殿堂級歌手林子祥最近宣布加入內地真人騷《我們的歌3》，同楊千嬅、齊秦、薛之謙等人參賽，惡鬥一眾新生代歌手，尋日（17日）更加已經快快手搞埋發布會，即席獻唱《敢愛敢做》，高亢靚聲唱到現場有回音咁滯，真係中氣十足，仲自爆唱歌唱足50年，希望年輕人要多聽老歌。同場又驚喜見到呂方都有現身，唔知佢都會參賽定係做嘉賓呢？

北上發展嘅佢，原來唔只上節目，有多位網友就上載多條林子祥現身廣州一個婚宴現場嘅片段，同場仲有星級魔術師甄澤權。見林子祥即場獻唱《真的漢子》等經典金曲，好唱口似足開騷咁。佢除咗行勻成個台同唔同方向嘅觀眾揮手外，佢仲親民地走到台下同大家握手，引得小朋友都埋身搵佢影合照，佢即刻童心未泯咁同小妹妹一齊舉V合照，被網友大讚佢Nice爆！

而網友最關心嘅，都係想知到底出幾多錢先可以請到林子祥出場？有網友就估至少30萬人民幣（約36萬港幣）先請得佢郁，又有人估林子祥平時應該唔係成日接呢種工作，可能係同新人有交情先會友情現身。