惹國籍風波　鞏俐霸氣神回：跟其他人沒關係！

內地近日整頓娛樂圈，令人人自危，更瘋傳存在「限籍令」，藝人謝霆鋒接受央視訪問時，就率先話申請緊放棄加拿大國籍，而有網民就翻出新加坡籍嘅鞏俐一個訪問，當主持人問佢擁有新加坡籍好多人討論，霸氣嘅佢就話：「改國籍的問題是個人選擇，更沒甚麼必要解釋，這個和其他人都沒關係，完全是自己的決定。」

鞏俐除咗覺得佢嘅國籍唔關人事外，最近憑《奪冠》有份競爭華鼎獎「最佳女主角」，同時又有新片《蘭心大劇院》預告片推出，佢緊係要百忙中都做吓宣傳。早前就做咗雜誌嘅封面女郎，啲相影得佢好靚，造型又前衞又妖艷，不過就惹來網民寸佢「着錯衫」，吸引無數網民討論佢啲「敏感相」。

事緣有眼利網民發現佢其中一個戴白假髮造型，身上着咗黑、白緊身衫、褲，而佢嗰件白色衫就「出事」，疑似係「拒用新疆棉」嘅運動品牌，不少網民「投訴」佢點解仲要着嗰個品牌嘅衫，更有網民話佢係新加坡籍，所以唔使理咁多。