不輸莊思敏！吳若希晒一件頭唔似生過

歌手吳若希（Jinny）同周柏豪、王敏奕拍完無綫新劇《旁觀者》後，就可以輕鬆吓，帶埋囡囡淼淼周圍玩，趁住中秋節前，天氣仲係熱到虛脫，就去主題樂園玩水上遊戲。嗰日佢帶埋囡囡同班Friend一齊去玩水，29歲、仲生咗兩個嘅佢，着咗一件頭黑色泳衣，論身材樣貌，佢同未生過嘅袁偉豪太太張寶兒、莊思敏姊妹相比，一啲都唔輸蝕，即使佢成頭濕晒又素顏，但手、腳仲係好纖幼，一啲都冇「媽媽肥」，所以話只要努力Keep Fit ，保持靚靚心情，其實生過嘅女人都可以好靚。

Jinny同班星級姊妹影完相，當然唔可以冷落囡囡啦，睇佢浸喺水度，攬實着咗救生衣嘅囡囡嘅樣，就知佢最錫嘅都係寶貝女啦，而淼淼真係大個咗好多喎，個樣愈嚟愈似媽咪，不過阿媽就唔想阿女露全相，所以幫個女加咗對卡通眼同條眉，咁又係嘅，阿女咁靚，唔遮一遮個樣，容乜易畀人睇蝕晒！