玩換眉挑戰！何超蓮素顏落廚煮螺絲粉　網民讚好手勢

賭王三房千金何超蓮樣子甜美，五官夠標致，但係唔知佢換咗條眉會變成點呢？佢近日接受「換眉」挑戰，用手機App選擇唔同嘅眉形，好似係標準眉、歐式眉、一字眉等，拼落去自己個樣嗰度睇吓襯唔襯，但係佢試咗幾個眉形都冇咩啱心水，當佢試到勾字眉嗰陣，由於望落個樣相當怪相，佢都忍唔住捲晒脷面露驚嚇表情，認真搞笑！而網民就話佢本身條眉就係最靚，但係有唔少網民就話佢好襯一字眉喎，唔知佢又點睇呢？

甘願為男友竇驍做「煮婦」嘅佢，呢次親自下廚煮螺絲粉，不過就唔係煮畀男友食，而係煮畀佢嘅朋友食，睇到素顏上陣嘅佢，頭戴卡通造型髮夾，相當可愛！而佢切雞肉、午餐肉、松茸等配料時，非常熟手，佢煮好嘅螺絲粉睇落賣相都好唔錯，佢朋友仲食到送心心添，真係入得廚房出得廳堂喎！網民大讚佢好手勢，話好想食埋一份，仲話好羨慕竇驍可以日日食到佢煮嘅嘢食呀！