《胃氣》X《未來戰士》！張敬軒玩惡搞化身麵包俠

超級英雄電影《尚氣與十環幫傳奇》（Shang-Chi and the Legend of the Ten Rings）熱爆全球，個個茶餘飯後都係講緊呢套戲，不過齋講都唔夠，有邊個好似「佢」咁有誠意翻拍埋先得㗎？「佢」係邊個？咪就係諗頭多多嘅張敬軒囉！

軒仔上載咗一段片，留言：「#開工唔玩好難過，見周末流流，我放吓自己收收埋埋嘅導演作品。見呢輪咁多動作片上畫，我都覺得我呢套同荷李活道Marvel合作嘅《胃氣》係時候公諸於世。」片中嘅軒仔先Chok爆問大家：「有冇試過觸電感覺？」之後佢就「瞬間轉移」學足啲英雄人物咁跪喺地上，突然Crossover《未來戰士》經典對白「I'll be back」，但惡搞成「I'll be bread」，仲化身麵包俠，麵包上有佢五官！

條片夠晒無厘頭，但短短33秒足已令網民一解鬱悶，唔少人留言「尚氣唔接胃氣」、「會唔會係marvel最冇貢獻嘅hero」、「你到底收收埋埋幾多片」，亦有人問佢：「最佳女主角遮遮呢？」軒仔就笑言：「去咗環球大廈匯錢！」