鄺潔楹落嘴頭向細路埋手 《七公主》深入民心勁興奮

2021年09月19日 14:05
東網電視
更多新聞短片
無綫小花鄺潔楹(Judy)繼早前參加市集初嘗賣曲奇滋味後,日前佢再搞快閃活動,同咖啡品牌合作推出中秋曲奇禮盒,帶20盒去到將軍澳某商場打躉開檔,期間落力叫賣,最後比預期快半個鐘、只係用咗個半鐘就賣晒現貨提早收工!
Judy感動話當日見到好多熟悉嘅面孔,有好多Fans都做咗回頭客,令佢減輕擔憂:「隔兩個星期再做Pop-up其實都幾大壓力,一嚟兩次活動好近期;二嚟今次只係做一日,要谷爆一日去做;三嚟同咖啡品牌合作,禮盒價錢貴過上次一倍,市民要消費可能要考慮耐啲,但好彩最尾大家都好捧場,亦識咗好多街客,幫我打咗支強心針,依家呢個中秋禮盒上網仍然仲有得買!」
事前Judy更已經諗定Sell曲奇招數,爆笑話專向小朋友埋手,然後狂出「口術」:「小朋友通常都鍾意食曲奇,問咗好多個都點頭話鍾意食,家長就自然會買,而禮盒入面有手沖咖啡包,呢樣亦有好多大人鍾意。」諗番起當日同市民嘅互動,Judy最開心係演出嘅無綫劇集《七公主》得到大家嘅喜愛:「咁啱嗰日係大結果,不斷被問劇情,原來大家都好留意我,冇再畀《愛.回家之開心速遞》同《學是學非》框死住。」續話希望遲啲可以同更多品牌合作,依家已經諗緊11、12月嘅推廣活動。