真相大公開!陳山聰重提與伍詠薇反目破冰過程

20210920
東網電視
更多新聞短片
藝人陳敏之最近開設個人短片頻道,於新一集中繼續有好友陳山聰做嘉賓,陳山聰為了幫陳敏之「谷收視」,大方重提當年與伍詠薇(伍姑娘)反面一事,將反目成仇到破冰大和解的過程,完完整整地公開,陳山聰認真唔話得!
事緣當年陳山聰35歲生日當晚,他突然致電契家姐伍詠薇並向對方說:「以後唔好再搵我!」豈料伍詠薇即時回覆:「好呀」!而當時伍詠薇即刻將事件不開名地放上社交網,公布與某人絕交,自此「姊弟」反目成仇。不過陳山聰於片中直言:「個電話只係玩吓」,加上佢覺得伍詠薇係玩得之人,而當時自己亦有醉意,估唔到件事鬧到咁大,而且搞到全港都知!
好多人都知陳敏之、伍詠薇及陳山聰以姊弟相稱,自從同伍詠薇反面後,連陳敏之都當佢透明,陳山聰於片中好傷心咁重提「冷巷事件」:「陳敏之喺條冷巷度,迎面行過嚟,我同佢眼神交流,佢就真係嗰啲......」繼而陳山聰模仿對方當時刻意避開自己眼神嘅動作:「咁樣就走咗去,係真!人情冷暖,呢個我明白嘅,調番轉,將心比己,我都可能係咁!」陳敏之就解釋番,原來係伍詠薇「落Order」,叫陳敏之唔好同陳山聰講嘢,所以佢唔敢違抗命令,但其實佢暗中同陳山聰已經有番聯絡。
最後好彩都係大團圓結局,陳山聰同伍詠薇「割席」5年,終於喺日本大和解,當時大家咁啱喺日本,陳山聰主動聯絡伍詠薇約食飯,對方亦一口答應,仲約喺東京一間居酒屋見面,一見到就即刻攬住,所有誤會即刻冰釋,一切盡在不言中,依家「三姊弟」感情好番晒!