Dear Jane入行15周年騷玩爆料 Jackal求婚唔成功?

2021年09月21日 09:03
東網電視
更多新聞短片
樂隊Dear Jane(DJ)為賀入行15周年,舉行5場紅館騷《Dear Jane Pendulum Tour 2021》,昨晚(20日)正式開鑼,更是他們首次挑戰4面台。主音Tim老婆楊洛婷舉「老公」Fans牌現身,今次還有好友曹敏莉陪同,另外曾若華、陳煒及男友等亦到場支持。
4位成員齊着黑衫Rock爆於4邊角落位登場,打頭陣唱出快歌《最後一間唱片舖》及《Yellow Fever》,全場High爆企晒起身大合唱,氣氛熾熱!緊接唱出名曲《不許你注定一人》時再次與Fans大合唱,Tim識趣派心送Fans,又勁Hyper打招呼,並指聽到全場大合唱好震撼:「由Confirm開紅館到依家不足1、2個月,呢2年都少好多騷做,前日行上台(綵排)嘅時候都『嘩』咗聲,原來咁大㗎呢到!呢2日淨係見到啲櫈,啱啱出嚟見到大家係嚇親!同時又好開心,多謝大家買飛入嚟睇我哋!」鼓手Nice笑話因為是開4面台,所以要不停向4邊揮手,Tim續大爆跟隊員輸賭,每次企錯位就輸20元,但話口未完,結他手Howie爆笑說:「你已經企錯咗!開騷不足20分鐘就贏20蚊真開心!」笑翻全場!
去到個唱第二部分,DJ分別請來獨立音樂創作人Miss Janni及王嘉儀合唱《身體語言》及《給防護罩一吻》。Tim趁轉Setting時,興奮於台上跑一圈,然後再問Howie企位,被對方笑:「今次聰明咗會問喎,哈哈!」續極罕發言的Nice話:「真係好開心!我哋努力做歌,但呢2年冇得出騷感受大家嘅力量,搞到啲歌就好似未完成、好虛無咁,每首歌都係你哋畀力量我哋,雖然咁講好誇張,但多謝!」
之後Howie笑話平時寫歌是受Tim跟老婆的恩愛故事所啟發,Nice抵死笑話:「但失戀歌就唔係!」Howie接玩爆料:「失戀就係我哋3個分,但求婚唔成功就係Jackal!」意外爆出隊友私事,但未知屬實,未幾,他再爆《草戒指》原定是寫給Tim作求婚之用,惟首歌未作完對方已成功抱得美人歸,故今晚決定將首歌用作給Jackal徵婚,更稱作品為「脫單神曲」!