姚焯菲聽日15歲生日收「小菲象」巴士應援：好感動

有「國民初戀」之稱嘅《聲夢》學員姚焯菲（Chantel）聽日（22號）就15歲生日，雖然佢正日牛一嗰日要同屋企人食飯慶祝，唔可以同班「小菲象」粉絲搞聚會，不過成半百人嘅「小菲象」就好有心，集資幫佢搞一系列應援活動，包括喺巴士站同車身賣廣告，仲喺巴士站度派有Chantel肖像海報、口罩套、奶茶杯套同相卡嘅福袋，知道Chantel唔鍾意啲粉絲亂咁使錢，所以以壽星女名義捐錢去慈善機會幫助弱勢社群嘅小朋友添。

Chantel知道班「小菲象」又乖又有心，為咗幫佢應援，要喺熱辣辣嘅露天巴士站度，搞到身水身汗好辛苦，所以佢就算素顏都照樣同班「小菲象」玩FaceTime，要親口多謝佢哋：「感動，好感動，我知今日好熱，大家都咁辛苦出嚟，所以好多謝你哋。」有「小菲象」問佢見到啲巴士廣告有咩感覺？佢就話：「好靚囉，同埋我知道準備呢啲燈箱唔平，同埋知道你哋好熱，所以（拜）託咗經理人幫你哋買咗啲嘢飲，希望你哋今日玩得開心啲。」「小菲象」仲大合唱生日歌畀Chantel聽添。