《瑯琊榜》開播6周年　胡歌掀起集體回憶殺！

要數內地男星胡歌嘅代表作，相信內地劇《瑯琊榜》一定榜上有名，9月19日就係呢齣經典劇開播6周年嘅紀念日，主角胡歌為咗感謝劇迷對《瑯》百看不厭，就喺呢個咁有紀念性嘅日子，透過短片向粉絲大派中秋彩蛋。首先係穿住藍色裇衫嘅型男胡歌現身，喺劇中飾演「麒麟之才」梅長蘇嘅佢，對住鏡頭話：「大家好，我是胡歌，也是梅長蘇。今天是《瑯琊榜》開播6周年的日子，感謝大家一直以來對這部劇的喜愛。」

《瑯》係胡歌轉型之作，其實喺某程度上，佢同梅長蘇呢個角色都有啲相似，因為佢哋無論喺外貌或內心，一樣經歷百劫，就好似現實生活中，佢都經歷過嚴重車禍，令塊面留下難以磨滅嘅疤痕，真係戲如人生，一樣死過翻生。之後更有女主角「霓凰郡主」劉濤，仲有「蒙大統領」陳龍、「蕭景宣」高鑫、「靜妃」劉敏濤、「言侯」王勁松同「寧國侯謝玉」劉奕君等等都有出鏡，啲劇迷紛紛留言話係集體回憶殺！