姜濤翻版？被指壓力爆煲！Ian澄清：我有嗎？

MIRROR氣勢凌厲，各個成員做到冇停手，當中姜濤早前就喺活動上暈倒，令人擔心工作過勞體力透支。而今日（21日）另一當紅成員陳卓賢（Ian）就被指疑壓力爆煲。Ian早兩日曾上載過一張黑白照到社交網，未有任何留言，相中有一個人坐喺度，而一眾好友包括馮允謙就紛紛留言表示支持。

之後Ian被「發現」曾喺凌晨寫下：「頭先爭啲呼吸唔到，點解會咁？幾廿歲人咩大場面未見過！見李嘉誠我都未驚過啦係咪先！自言自語不用理我系列」之後被指極速刪文。不過，今日Ian就轉載有關報道內容，留言澄清：「LOLLLL DID I?（大笑出嚟，我有嗎？）」原來有關發文，係有粉絲以Ian舊相（7月30日）再加文字出Post而引起誤會，一眾「Hellosss」（Ian粉絲名稱）可以放心喇！

而花姐今日亦發文表示：「今日壓力好大，因唔知醒遲到3個鐘，另外祝大家中秋節快樂，請如實報道。」