中秋變谷劇戰場　楊冪劉亦菲「抽水」當做節

今日（21日）係中秋佳節，大家都等住一收工放學就即刻去慶祝，食月餅、玩燈籠都係小事，點及內地Marketing識玩，當中由楊冪、許凱主演嘅劇集《愛的二八定律》就即刻晒出二人拖手嘅背影劇照當「賀圖」，順勢祝大家人月兩團圓，又可以宣傳新劇，引得唔少粉絲轉發發文。

原來唔係得《愛》識玩，由劉亦菲、陳曉主演嘅劇集《夢華錄》亦用咗一模一樣嘅手法去Sell劇，不過佢哋用嘅劇照就更加親密，係劉亦菲成個人挨落陳曉懷中嘅背影照，同樣都係睇唔到樣。不過要數，就一定係迪麗熱巴最有「Heart」，因為佢主演嘅新劇《安樂傳》就晒出迪麗熱巴三七面靚相，係唯一一張睇到樣嘅宣傳照，所以佢個Post去到截稿前已經有超過24萬人留言，對比楊冪同劉亦菲得幾千留言量比，今次迪麗熱巴贏晒！