龔柯允組馬來西亞5人幫　食家鄉菜慰寂寞的心

歌手龔柯允（Karen）今日（21日）現身電視城為節目《勁歌金曲》錄影，身穿白色套裝的她，內搭一件黑色Bra top騷腰，大晒健康性感！為配合節目向已故天后梅艷芳致敬的主題，她透露揀選了其經典歌《抱緊眼前人》演唱，雖然已經特別抽時間練歌，但仍然好大壓力：「呢首歌全港嘅人都識唱，唔可以唱錯，加上我係馬來西亞人，廣東話唔係咁好，都係嚟香港先學，練歌不停搵啲粵語拼音，而首歌係講人鬼戀，刻意升高6度唱，希望唱出幽怨、纏綿感覺。」

講到日前跟「同鄉」Gin Lee（李幸倪）、廖子妤、林宣妤及楊秀惠聚餐，組成「馬國5人幫」，原來Karen跟Gin Lee 識於微時，以前曾屬同一間唱片公司，之後再由對方介紹之下認識其他成員：「大家嚟香港發展都好艱辛，互相明白大家嘅經歷，疫情之下又冇得返馬來西亞，就趁中秋節約大家出嚟，靠食家鄉菜慰藉寂寞心靈，而咁啱嗰日係馬來西亞日，又考大家歷史，哈哈！」她指每逢大時大節都特別掛住屋企人，自疫情爆發後，已有兩年沒有回家：「只能靠FaceTime傾偈，見到佢哋好嘈，我就更加孤獨！」