化身航天迷追星！章子怡首次做導演：係一種責任

內地影星章子怡貴為影后演技當然不容置疑，仲曾參與荷里活大片演出，紅到去國際！佢最近接受新挑戰，聯同吳京、徐崢及沈騰，為內地電影《我和我的父輩》擔任導演兼親自做埋主角！《父輩》趁住尋日（21日）中秋節喺內地舉行特別活動，章子怡帶埋兩位戲中小演員袁近輝、任思諾為現場觀眾送上中秋節祝福。

對於首次升呢做導演，佢話：「自己拍了20多年戲，根本沒有想過自己會做導演，當迎來這次特別的工作，是一種責任，也覺得確實是一項富有挑戰的工作。」而佢喺戲中執導嘅單元，就係講述研製中國第一顆人造衞星，背後航天家庭嘅故事。身為航天迷嘅佢，對於能夠同中國首名航天員楊利偉見面，即化身成小粉絲「追星」，表示感到相當興奮，並想向對方請教各種問題添！

另外，有仔萬事足嘅佢，尋日（21日）中秋節就話忙到月餅都唔記得食，但好在可以左擁右抱，同仔女錫錫抱抱已經甜在心頭！