林子祥驚人肺活量引全國哄動　祖兒變迷妹當熒光棒係咪

天后容祖兒每次開騷表演，都會有千千萬萬粉絲喺台下為佢歡呼，但其實佢都有做「迷妹」嘅時候！尋晚（21日）喺內地中秋晚會上，有份表演嘅祖兒坐喺台下睇林子祥演唱時，頓時變成小歌迷，將熒光棒當成咪，又揈又唱，非常投入！而平時Cool爆嘅謝霆鋒都高舉熒光棒，笑晒口咁，蔡卓妍（阿Sa）及鍾欣潼（阿嬌）、惠英紅都一齊唱，氣氛非常好，可想而知，林子祥人氣幾咁犀利！

其實，唔只在場人士睇得咁興奮，網上都引起一片討論，「林子祥肺活量有多強」更登上熱搜，至今已有3.3萬討論及1.6億閱讀次數，網民都唔敢相信佢已經73歲，「我73歲能這麼走出來我就阿彌陀佛了！」、「鏡頭無論是切到台上台下都讓人好激動！」、「70多歲了還是真唱，假唱的那些人！不慚愧嗎？ 」​